Ասապով

* * *

Առ քեզ գոչեմ արտասուելով,
Աղաղակեմ ողբալով,
Հոգոց հանեմ հառաչելով,
Մեղայ ասեմ միշտ լալով.
Կոյս Մարիամ, Աստուածածին, է~,
Օգնեա խաւարեալ գերոյս:

Սրտաբեկեալ տարակուսիմ,
Մահու յահէն յոյժ զարհուրիմ,
Զքեզ յիշելով մխիթարիմ,
Ողորմութեան քո ակն ունիմ.
Կոյս Մարիամ, Աստուածածին, է~,
Օգնեա խաւարեալ գերոյս:

Աշխարհս է ծով , ես կու ծփիմ,
Նաւաբեկեալ ընկղմիմ,
Ինձ ձեռն տու, հա'ն ի ծովէս,
Զի միայն յոյս, կորնչիմ.
Կոյս Մարիամ, Աստուածածին, է~,
Օգնեա խաւարեալ գերոյս:

Պարտաւորեաց զիս թշնամին
Եւ արար կոխան ոտին,
Զքեզ աղաչեմ կողկողագին,
Փրկեա ի ձեռաց չարին.
Կոյս Մարիամ, Աստուածածին, է~,
Օգնեա խաւարեալ գերոյս:

Ողորմագին ձայնիւ գոչեմ,
Պաղատելով աղերսեմ,
Անկեալ առ յոտս քո, հառաչեմ,
Օգնութիւն գերոյս խնդրեմ.
Կոյս Մարիամ, Աստուածածին, է~,
Օգնեա խաւարեալ գերոյս:

Վա'յ զիս, որ մոլորեցայ,
Յանհուն մեղօք ես կորայ,
Ո'վ մայր կենաց, ինձ ողորմեա,
Ցրուեալ գերիս ժողովեա.
Կոյս Մարիամ, Աստուածածին, է~,
Օգնեա խաւարեալ գերոյս:

Կուր Ասապով, քանի՞ կաս քուն,
Մեղայ ասա, լեր արթուն,
Մատո Կուսին միշտ գոհութիւն
Եւ իւր Որդոյն օրհնութիւն.
Կոյս Մարիամ, Աստուածածին, է~,
Օգնեա խաւարեալ գերոյս:

* * *

Անճառին տաճար,
Բարի հաշտարար,
Գերագոյն գտար, Մարիամ,
Դու յերկնից գովեալ:

Երգեն սերովբէքն,
Զարմանան քերովբէքն,
Էրանալեալ սուրբ կոյս, Մարիամ,
Ընտրեալդ ի փրկչէն:

Թագդ պարծանաց,
Ժառանգ աւետեաց,
Իսկուհի մաքուր, Մարիամ,
Լուսին աննման:

Խորան խնդալի,
Ծառ նարնջենի,
Կաքաւ քաղցրախօս, Մարիամ,
Հաւիկ սխրալի:

Ձայն քո տատրակի,
Ղամբար գիշերի,
Ճրագ լուսատու, Մարիամ,
Մթան գիշերի:

Յանթառամ ծաղիկ,
Նոր գարնան փթթիկ,
Շող արեգական, Մարիամ,
Ոսկէ խնծորիկ:

Չի կայ քեզ նման,
Պտուղ ցանկալի,
Ջուր պարզ եւ մաքուր, Մարիամ,
Ռատ աղբիւր վիմի:

Սատաֆ ի ծովին,
Վանիչ մարգարտին,
Տաճար տէրունի, Մարիամ,
Րաբունուն վերին:

Ցօղ գարնանային,
՚Ւ իւսեալ ոսկով,
Փափագեալ ցանկամ, Մարիամ,
Քո ճոխ պատկերին:

Ինձ մեղաւորիս`
Աստուածապովիս,
Սիրաբար գթա, Մարիամ,
Այգդ առաւօտ ինձ:

Պաղատեա վասն իմ,
Որդիդ Միածին,
Վերաբերեա զիս, Մարիամ
Ի յաջակողմին:

Երեւեալ լուսին,
Բարկ արեգակին,
Աստղ առաւօտին, Մարիամ,
Նման պատանին:

* * *

Արքայաշէն տաճար,
Բանին խորան կազմեալ,
Անուշահոտ բուրվառ
Է', անապական կոյս:

Սիրալիր սուրբ տատրակ,
Եղեր գարնան գուշակ,
Տեառնագրեալ տախտակ.
Է', անապական կոյս:

Արմատ անմահութեան,
Շառաւիղէ Դաւթեան,
Ծնար զանմահ արքայն.
Է', անապական կոյս:

Պետին Գաբրիէլի,
Քեզ աւետեաց հոգի.
Քրիստոս ի քէն ծնանի.
Է', անապական կոյս:

Ոսկեղէն սափոր,
Լցեալ մանանայիւ,
Սեղան եղեր հացին.
Է', անապական կոյս:

Վայելչագեղ ծաղիկ,
Խունկ եւ կինամոնիկ,
Եփեալ անուշ հրիկ.
Է', անապական կոյս:

Ի յամենայն ազգաց
Ընտրեալդ ի հազարաց,
Թագաւորեալ ազանց.
Է', անապական կոյս:

Խաւարեալ Ասապովիս,
Վիրաւորեալ գերիս,
Փրկեա ի հրոյն զհոգիս.
Է', անապական կոյս:

* * *

Արարչագործ Տէրն երկնից,
Զքեզ առեալ հողոյ զարմից,
Արար աթոռ քերովբէից.
Ուրախ լեր, Մարիամ, ուրախ լեր:

Սոսկալի գտար վեհից,
Ընտրեալդ ի հազար բիւրից,
Գուշակեալդ ի մարգարէից.
Ուրախ լեր, Մարիամ, ուրախ լեր:

Աստղ ծովային լուսատու,
Խաւարեալ ծառայս կեցո,
Թմբրեալս ի մեղաց զարթո.
Ուրախ լեր, Մարիամ, ուրախ լեր:

Պարտէզ փակեալ, վարդով լի,
Աղբիւր եղեալ յադենի,
Արբուցանող աշխարհի.
Ուրախ լեր, Մարիամ, ուրախ լեր:

Ոսկի խնձոր եռակի,
Շարահիւսեալ մարգարտի,
Կայծ եւ սուտակ նազելի.
Ուրախ լեր, Մարիամ, ուրախ լեր:

Վառ ծիածան սխրալի,
Լուսատու ամէն տեղի,
Ծագող պայծառ արեւի.
Ուրախ լեր, Մարիամ, ուրախ լեր:

Ի քէն հայցեմ, սրբուհի,
Ինձ ողորմեա, Իսկուհի,
Անփորձ պահեա աշխարհի.
Ուրախ լեր, Մարիամ, ուրախ լեր:

Խէվ Ասապով ըսպահանցի,
Զքեզ աղաչէ, սուրբ տիրուհի,
Արժան արա ձիր շնորհի.
Ուրախ լեր, Մարիամ, ուրախ լեր:

* * *

Աստուածածին ամէնօրհնեալ,
Հոգոյն սրբոյ եղեր լցեալ.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Սէրովբէից միշտ երանեալ,
Հողեղինաց գնտիցն օրհնեալ.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Աստուածորդւոյն մայր կոչեցար,
Ամէն ազգաց երանեցար.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Պտուղ բարի օրհնեալ ծառէն,
Պարգեւեցար մեզ Արարչէն.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Ով հանապազ զքեզ յիշէ,
Ամէն չարէ ազատէ,
Տիրամայր, Տիրամայր,
Վասն իմ առ որդիդ քո բարեխօսեա անդադար:

Վերակացու լեր ծառայիս,
Մարդոյ չարէ ազատեա զիս.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Ի քէն հայցեմ կոյս տիրածին,
Լեր հովանի իմոյ անձին.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Կուր Ասապով, աղքատ հոգի,
Զքեզ աղաչէ, երանուհի.
Տիրամայր, Տիրամայր,
Վասն իմ առ որդիդ քո բարեխօսեա անդադար:

Գլխավոր էջ    Նախորդ էջ    Հաջորդ էջ