Մովսես Խորենացի (5-րդ դար)
* * *
Ուրախացիր, Սրբուհի,
Գաբրիելի ավետումով,
Նա քարոզեց գալուստը
Երկնքի Տեր Արքայի:
Ողջույն քեզ, Մարիամ,
Քեզ վրա սուրբ Հոգին կիջնի,
Եվ բարձրյալի զորությունը
Քեզ կլինի հովանի:
Նա, որ ծնվելու է Քեզնից,
Առաջնորդն է Իսրայելի
Եվ տարածելու է ամենուր
Հզոր Աստծո խոսքն անմահ:
* * *
Ուրախ եղիր, Բերկրյա՛լ,
Ամենասու՛րբ Կույս,
Որ ծնեցիր աշխարհի
Արդարության արեգակը,
Որը լուսավորեց
Մարդկային ազգերը:
Ուրախ եղիր, Բերկրյա՛լ,
Կնքվա՛ծ դուռ,
Որ ծնեցիր աշխարհին
Քրիստոս թագավորին,
Որը նստում է անձեռակերտ
Իր աթոռի վրա:
* * *
Ուրախ եղիր, Մարիամ, սուրբ Աստվածածին,
Որ որովայնիդ մեջ կրեցիր
Տեր Աստծուն մեր հայրերի:
Ուրախ եղիր, Մարիամ, Կույս անարատ,
Որ անպատմելիորեն ծնեցիր Քո Որդուն՝
Տեր Աստծուն մեր հայրերի:
Ուրախ եղիր, Մարիամ, Մա՛յր Քրիստոսի,
Քանզի քեզնից ծագեցրեց մեր երեսի լույսը՝
Քրիստոս Աստվածը մեր հայրերի:
* * *
Ուրախ եղիր,
Անհարսնացյալ Մայր,
Որ մարմնացյալին տիրաբար
Որովայնիդ մեջ կրեցիր:
Ուրախ եղիր,
Անհարսնացյալ Մայր,
Որ անկրելի էությունը
Արգանդիդ մեջ անապականաբար կրեցիր:
* * *
Ուրախ եղիր, Աստվածածին,
Հույս և փրկության Մայր,
Քեզ, ընդունող լույսի,
Մեծարում ենք:
Քեզ, լույս Մայր և Կույս,
Քեզ, գանձդ կյանքի,
Աստվածային ձայնով, ցնծությամբ
Մեծարում ենք:
Անարատ լույսի սուրբ Մայր,
Հրեշտակային օրհնությամբ պատվված,
Քեզ, ընդունո՛ղ լույսի,
Մեծարում ենք:
* * *
Ուրախացիր, Աստվածածին,
Վերօրհնյալդ սերովբեներից,
Քեզնից մեզ լույս ծագեցրիր,
Մայր եղար բարձրացնողին.
Ազգեր ու ցեղեր քեզ ենք մեծարում:
Հիմնը եղար եկեղեցու,
Եղար խորանը սուրբ Հոգու,
Հրեշտակներից սպասավորվեցիր,
Գաբրիելը քեզ ավետեց,
Ազգեր ու ցեղեր քեզ ենք մեծարում:
Հիանալով, տեսնում ենք
Հրաշալի խորհուրդը հայտնված,
Սուրբ Հոգուց հղացած՝
Աստծո էությունը մարմնով ծնեցիր,
Ազգեր ու ցեղեր քեզ ենք մեծարում:
* * *
Աստվածածին սուրբ Կույս,
Անհարսնացյալ Մարիամ,
Որ օրհնյալդ ես կանանցից,
Քեզ ենք օրհնում միշտ,
Արժանավորիդ մեծարում:
Անապական տաճար և առագաստ լույսի,
Քեզ փեսայանալով՝
Քո մեջ կյանքի խորհուրդը բնակվեց,
Քեզ ենք օրհնում միշտ,
Արժանավորիդ մեծարում:
Կենդանի հուրը, որով մորենին վառվեց,
Քո արգանդում անվնաս կրեցիր
Եվ ծնեցիր Աստված և մարդ.
Քեզ ենք օրհնում միշտ,
Արժանավորիդ մեծարում:
* * *
Քեզ, Աստվածածին,
Աղբյուր անսպառ լույսի,
Որ լուսավորում է հավատացյալներին,
Միասնական երգի ձայնով մեծարում ենք:
Դու՝ պարծանք մարդկանց կուսության,
Դու՝ ուրախություն հրեշտակների,
Դու՝ անեծքների հաղթող,
Որի համար, Աստվածածին, Քեզ մեծարում ենք:
Դու՝ ճշմարիտ արևելք՝
Արդարության արեգակի,
Որից ծագեց տիեզերքի փրկությունը,
Միասնական երգի ձայնով մեծարում ենք:
* * *
Լույս, լույսի Մայր
Եվ կենարար էության բնակարան,
Քեզ երանի են տալիս ցեղերն, ազգերն ամենայն:
Մայր ստեղծողի
Եվ բնության կերպը նորոգողի,
Քեզ երանի են տալիս ցեղերն, ազգերն ամենայն:
Լույս ծագեց քեզնից՝
Խավարում նստածներիս համար,
Քեզ երանի են տալիս ցեղերն, ազգերն ամենայն:
* * *
Սյուն լույսի և շուք ամպի, սուրբ Կույս,
Որ ցողեցիր մեզ երկնային ցողով
Քեզ ենք բարեբանում,
Կույս Աստվածածին:
Անկեզ մորենի և հողեղեն սերովբե, սուրբ Կույս
Կյանքի պտուղը քեզանով տվեց մեզ Տերը,
Քեզ ենք բարեբանում,
Կույս Աստվածածին:
Անեծքների վերացնող և մեղքերի քավիչ, սուրբ Կույս,
Որ արարածներից ամենասուրբը բարձեցիր քո գրկում,
Քեզ ենք բարեբանում,
Կույս Աստվածածին:
* * *
Աստվածածին, Մայր լույսի,
Սուրբ Կույս, լուսեղեն տաճար.
Ում երկինքները բավական չէին,
Բնակվեց քո մեջ, քեզնից մարմնացավ:
Քեզ, անհարսնացյալ,
Կանանց մեջ օրհնյալդ,
Որ կրեցիր քո մեջ ամենամեծ բնությունը,
Օրհնությամբ մեծարում ենք:
Ուրախ եղիր, աթոռ փրկության,
Մարդկանց հաստատության հույս,
Օրենքների և շնորհների միջնորդ,
Օրհնությամբ անդադար մեծարում ենք: