Հովհաննես Պլուզ Երզնկացի (13-րդ դար)
ՄԵՂԵԴԻ ՊԸԼԶՈՅ ԱՍԱՑԵԱԼ Ի ԾՆԸՆԴԷ ԽՈՍՐՈՎԱՅԻՆ
Յանեղական լոյսն անժամանակեայ,
Լոյսն անվայրափակ,
Ի քե՜զ պարագըրի, Մարիա՜մ.
Աւետի՜ս, աւետի՜ս, աւետի՜ս քե՛զ, Տիրամայր:
Ո՜վ նոր խառնումն սքանչելի,
Անեղ ընդ եղումն,
Կուսութիւն և ծնունդ ի քե՜զ ը՜ներգործի, Մարիա՜մ,
Ուրա՜խ լեր, ուրա՜խ լեր, ուրա՜խ լեր, կո՛յս Տիրամայր:
Հաւր Բանին մայր յերկրի,
Կոյս սուրբ՝ տըւողին մեզ հայր՝ յերկինս,
Խոսուն խորան ի քեզ բնակողին, Մարիա՜մ.
Երանի՜, երանի՜, երանի՜ քե՛զ, Տիրամայր:
Այսաւր մեծ զարմանք հրաշից,
Տէրն որդի ծառայի ծնեալ,
Ծառայն որդի ստեղծողին, Մարիա՜մ.
Մա՜յր լուսոյ, մա՜յր լուսոյ, մա՜յր լուսոյ, կո՛յս Տիրամայր:
Նոր պըտուղ բնութեանս հաղցրահամ,
Արմատ նորոյ աշխարհի,
Մահու մա՜ւրը բըժիշկ կենաց, մա՜յր մաքուր, Մարիա՜մ.
Աննըմա՜ն, աննըմա՜ն, աննըմա՜ն, կո՛յս Տիրամայր:
Ի քէն ցընծութիւն մարդկան,
Երկանցն Եւայի լուծիչ,
Ադամայ ազատիչ, Դրախտին բացող դըրան, Մարիա՜մ.
Ցընծացէ՜ք, ցընծացէ՜ք, ցընծացէ՜ք, որդի՜ք Ադամայ:
Սէրովբէ հողանիւթ, հրածին ամպ,
Երկի՜նք՝ արեգականն արդար,
Մայր արքային մեծ, լե՛ր մեզ բարեխաւս, Մարիա՜մ.
Աւրհնեա՜լ մայր, աւրհնեա՜լ մայր, աւրհնեա՜լ մայր, կո՛յս Տիրամայր:
Ի քէն ծընեալ ծեր մանկանն,
Ընդ Հաւրէ’ւ Հոգւոյն սըրբոյ,
Փա՜ռք և պատի՛ւ յաւիտեա՜նս յաւիտե՜նից.
Աւրհնեցէ՜ք, աւրհնեցէ՜ք, աւրհնեցէ՜ք, որդի՛ք Ադամայ: